Gagnrýnir fjölgun listamannalauna

„Starfslaun listamanna eru 267 þúsund krónur á mánuði eða um 80% hærri en grunnatvinnuleysisbætur," segir Haukur Þór Hauksson viðskiptafræðingur og prófkjörsframbjóðandi. Í aðsendri grein sem birtist á Vísi í dag gagnrýnir Haukur harðlega fyrirhugaða fjölgun listamannalauna, en sú fjölgun er einn liður í aðgerðum ríkisstjórnarinnar til að sporna við atvinnuleysi. Haukur gagnrýnir hins vegar að peningar séu settir til listamanna á ríkisstyrkjum á sama tíma og fjölskyldurnar í landinu þurfa að hafa sig allar við til þess að láta enda ná saman.

„Öfugt við örorkubætur og aðrar bætur almannatrygginga, sem skerðast hafi bótaþeginn aðrar tekjur, eru starfslaunin beinn styrkur til listamanna sem sumir hverjir eru með ágætar tekjur fyrir og hafa þegar komið sér rækilega á framfæri hérlendis sem og erlendis. Slíka fjármuni á að nýta í þágu þeirra sem eru í sárri neyð, svo einfalt er það," segir Haukur Þór.

Ríkisstjórnin kynnti á föstudaginn tillögur í atvinnumálum,sem ætlað er að skapa rúmlega 4000 ársverk á næstu misserum. Um er að ræða störf í byggingariðnaði, framkvæmdir við snjóflóðavarnir, gróðursetningu, grisjun og stígagerð, orkuviðhald og orkusparnað, minni útflutning óunnins fiskjar, hækkun endurgreiðslna vegna kvikmyndagerðar, þróunarverkefni í ferðaþjónustu, frumkvöðlasetur í Reykjavík, sérfræðinga af atvinnuleysisskrá til nýsköpunarfyrirtækja, bætta samkeppnisstöðu nýusköpunarfyrirtækja og fjölgun þeirra sem njóta listamannalauna.