Tæplega 2000 manns létust árið 2008

1.987 einstaklingar, 1.005 konur og 982 karlar, létust á árinu 2008. Þetta kemur fram í tölum Hagstofunnar yfir dánarmein. Gögnin byggja á dánarvottorðum allra þeirra sem létust árið 2008 og áttu lögheimili hér á landi.

„Helstu dánarmein þjóðarinnar eru nú sem fyrr sjúkdómar í blóðrásarkerfi og þá aðallega hjarta- og heilaæðasjúkdómar. Á árinu 2008 létust 706 af sjúkdómum í blóðrásarkerfi, þar af 375 úr blóðþurrðarhjartasjúkdómum, 154 konur og 221 karl. Alls létust 147 úr heilaæðasjúkdómum, 85 konur og 62 karlar.," segir í frétt á heimasíðu Hagstofunnar.

38 sjálfsvíg

Krabbamein er næst stærsti flokkur dánameina, Þriðji stærsti flokkurinn eru sjúkdómar í öndunarfærum og sá fjórði er dauðsföll vegna ytri orsaka. „Af þeim voru dauðsföll sem tengdust óhöppum almennt voru alls 63 og í þeim hópi voru 22 konur og 41 karl. Alls létust 16 manns í umferðarslysum. Sjálfsvíg voru 38 á árinu og féllu 11 konur og 27 karlar fyrir eigin hendi. Það er svipuð tíðni og undanfarin ár."

Þá var skráð 131 ótímabært dauðsfall á Íslandi en þar eru um að ræða andlát vegna tiltekinna dánarorsaka sem hefði mátt komast hjá með viðeigandi meðferð eða forvörnum.

Nánar má kynna sér málið hér.