Guðjón: Sigurinn skipti öllu máli

Guðjón Þórðarson, stjóri Crewe, var afar ánægður með strákana sína eftir að Crewe vann sinn annan leik á fjórum dögum í kvöld.

„Það skipti öllu máli að vinna þennan leik því ég vissi að hann yrði erfiður. Það er alltaf erfitt að mæta liðum sem hafa hæfan stjóra eins og Colin Todd. Ég hrósa mínum mönnum fyrir að taka á honum stóra sínum og verjast vel í 90 mínútur," sagði Guðjón við heimasíðu Crewe í kvöld.

„Við fengum betri færi í leiknum og markvörðurinn þeirra varði vel. Við fengum færi til að klára leikinn í fyrri hálfleik og við verðum að nýta færin okkar betur.

Ég vissi líka að við myndum fá fleiri færi og ég er alltaf sigurviss á meðan við höldum okkar marki hreinu. Tölfræðin lýgur ekki og 1-0 sigur er ávísun á þrjú stig."