Hodgson sagði nei takk við Svíþjóð og Noreg

Roy Hodgson, stjóri Fulham, er sem fyrr eftirsóttur þjálfari og bæði Noregur og Svíþjóð hafa falast eftir kröftum hans.

Hodgson staðfesti aftur á móti í dag að hann hefði hafnað landsliðsþjálfarastöðunum hjá báðum þjóðum.

„Það er alltaf gaman að koma til greina í stöður. Ég hef aftur á móti tjáð öllum að ég sé með samning við Fulham og sé ekki á förum þaðan," sagði Hodgson en hann fer í nýjar samningaviðræður við félagið í lok tímabilsins.

Þess má síðan geta í framhjáhlaupi að sögur herma að Hodgson hafi eitt sinn verið til í að taka við íslenska landsliðinu en KSÍ ku ekki hafa haft áhuga á kröftum hans.