Lescott: Fór ekki til City peninganna vegna

Joleon Lescott segeir að hann hafi ekki ákveðið að ganga til liðs við Manchester City frá Everton peninganna vegna.

Mikið var fjallað um félagaskipti Lescott í sumar en í fyrstu vildi Everton alls ekki selja hann. Lescott fór í fýlu og var svo seldur.

„Dagurinn sem ég fór til City er einn besti dagur lífs míns," sagði Lescott í samtali við enska fjölmiðla. „Og þetta snerist ekki um peningana. Ég man að einn þjálfaranna hjá Everton sagði þetta um mig og ég furðaði mig á því hvernig maður sem hafði þekkt mig svo lengi skuli hafa látið þetta út úr sér."

„Ég var með frábæran samning hjá Everton og þurfti ekki á meiri pening að halda. En hjá City á ég meiri möguleika að ná árangri fyrr en ég átti hjá Everton."

„Það er frábær stemning hjá City og við leikmenn náum mjög vel saman. Við erum mjög spenntir fyrir tímabilinu og sú tilfinning er ríkjandi að við getum náð góðum árangri fyrr en síðar."