Aron Einar: Ég er ekki brotinn

Aron Einar Gunnarsson segir í samtali við Vísi að hann telji það ólíklegt að hann sé fótbrotinn og hann verði búinn að jafna sig eftir 2-3 vikur.

Hann var borinn af velli í leik Coventry og Sheffield Wednesday í gær og fluttur upp á sjúkrahús.

„Þar hitti ég lækni sem skoðaði mig lítillega og sagði að ég væri brotinn," sagði Aron. „Því leist mér alls ekki á þetta."

„En ég fór svo í myndatöku og þá kom í ljós að ég var ekki brotinn. Það er hins vegar spurning hvort það hafi komið sprunga í beinið og mun ég fara í aðra myndatöku á annað hvort miðvikudaginn eða fimmtudaginn þegar bólgan verður farin."

„En ég held að ég sé bara með snúinn ökkla og muni jafna mig á 2-3 vikum. Ég veit svo sem ekki hvort að liðböndin í ökklanum hafi eitthvað skaddast en ég vona ekki."

Aron Einar var tæklaður af leikmanni Wednesday með fyrrgreindum afleiðingum. „Ég stóð í vinstri löppina þegar hann klippti mig niður. Ég gat því ekki hoppað upp úr tæklingunni. En þetta leit ekkert sérstaklega vel út, sérstaklega þar sem ég var borinn af velli með súrefnisgrímu á andlitinu. Þetta var þó ekki það slæmt og ég var fljótur að taka hana af mér," sagði hann í léttum dúr.

„Ég vona auðvitað innilega að þetta eru ekki alvarleg meiðsli en þau eru óneitanlega hluti af fótboltanum. Ég hef verið heppinn hingað til og aldrei meiðst illa," sagði Aron.