Siðlausir umhverfisþrjótar skjóta kynblending steypireyðar

Konungsríki steypireyðarinnar heitir þátturinn. Milli þess sem fagrar myndir eru sýndar af þessu stærsta dýri sem lifað hefur á jörðinni er fylgst með útsendurum þáttarins leita að vísbendingum á japönskum fiskmarkaði um að einhverjir þrjótar víli ekki fyrir sér að drepa steypireyði og selja ólöglega en hún er alfriðuð.

Útsendararnir kaupa hvalkjöt í Tókýó, læsa sig inni á hótelherbergi og setja þar upp rannsóknarstofu til að greina sýnið enda tekið fram að stranglega sé bannað að flytja afurðir dýra í útrýmingarhættu á milli landa. DNA greining stemmir við steypireyði en.. kjötið reynist af enn sjaldgæfara fyrirbæri, kynblendingi steypireyðar og langreyðar.

Sjónvarpsmennirnir leita upprunans; það voru Íslendingar sem skutu hvalinn og seldu til Japans sem langreyði. Rætt er við Gísla Víkingsson hvalasérfræðing sem útskýrir að kynblendingurinn líktist langreyði á bakinu.

Áhorfendur fá þá tilfinningu að þetta sé nýlegt dæmi en hér er í raun um tuttugu ára gamlan atburð að ræða. Gísli sagði í samtali við Stöð 2 í dag að þá hafi í fyrsta sinn í heiminum verið sýnt fram á kynblöndun milli þessara stofna og stórhvala yfirleitt. Þetta hafi þótt mjög merkilegt og tvær greinar verið gefnar út um þetta í vísindartímaritum.

Fréttir um þessa kyndblendingsveiði Íslendinga birtust raunar einnig í heimspressunni fyrir tíu árum en hérlendis hafa menn greint fjóra slíka hvali til þessa.

Gísli segir það mjög sérkennilegt viðhorf að það sé jafnvel enn meiri glæpur að veiða blendinga heldur en steypireyði því yfirleitt séu blendingar flokkaðir til einskonar mistaka í náttúrunni.

Hvað sem líður útskýringum er hætt við að áhorfendur náttúrulífsþáttarins hugsi ekki hlýlega til Íslendinga á næstunni.