Frá Tiger til Puma

Vefritið TMZ hefur greint frá því að íþróttafyrirtækið Puma sé á höttunum eftir Elinu Nordegren, eiginkonu Tiger Woods, og vilji fá hana sem nýtt andlit fyrirtækisins.

Samkvæmt TMZ eru samningar milli Puma og Nordegren á lokastigi. Talsmaður fyrirtækis­ins hefur jafnframt staðfest að viðræður hafi átt sér stað og hyggst Puma framleiða nýja fatalínu, Tretorn, og er innblástur fyrir línuna sóttur til heimalands Nordegren, Svíþjóðar. Tals­maður­inn sagði jafnframt að ástæðan fyrir því að Puma hafi áhuga á Nordegren sé sú að hún „passi við ímynd fyrirtækisins".

Elin Nordegren hefur aðeins sést tvisvar eftir að upp komst um framhjáhald Woods. Hún brosir framan í myndavélarnar og ber sig vel en athygli vekur að hún ber engan hring á fingri.