Nicky Butt sagði Owen fyrst frá áhuga United

Michael Owen hefur greint frá því að það var Nicky Butt, félagi hans hjá Newcastle, sem benti honum fyrst á að Alex Ferguson, stjóri Manchester United, hefði áhuga á honum.

Owen sagði þetta í löngu viðtali við The Daily Telegraph sem má lesa hér. Hann sagði að honum hafi liðið eins og að hann væri í blindgötu þegar hann var hjá Newcastle en samningur hans við félagið rann út í haust.

„Ég er enn aðeins 29 ára gamall en hefði þess vegna geta verið á fimmtugsaldri miðað við hvað fólk hefur verið að segja um mig," sagði Owen.

„Ég var viss um að einhver þurfti á sóknarmanni að halda - einhverjum sem væri búinn að sanna sig í ensku úrvalsdeildinni."

Skömmu síðar hringdi Nicky butt, félagi hans hjá Newcastle, í hann og sagði honum að Alex Ferguson hefði haft samband við sig. Butt lék hjá United á sínum tíma.

„Nicky sagði að ég mætti alls ekki segja neinum frá því, sérstaklega ekki stjóranum, en hann hefði hringt og væri að spyrja hvernig ég hefði verið að æfa," sagði Owen. „Konan mín var í hinu herberginu og ég byrjaði bara að öskra á hana. Við vorum virkilega spennt, bæði tvö."

Svo hringdi Ferguson. „Um leið og hann sagði „Michael" vissi ég að þetta væri hann. Það var ekki um að villast. Hann sagði að félagið væri að leita af sóknarmanni þar sem Carlos Tevez væri að fara. Það hefði ekki tekist að landa Karim Benzema og því væri hann að leita af leikmanni sem gæti skorað mörk."

Owen hefur þegar reynst United happafengur því hann skoraði sigurmark United í dramatískum 4-3 sigri liðsins á Manchester City fyrir skömmu.

Owen segir einnig í viðtalinu að hann hafi ekkert breyst á undanförnum árum og stefnir að því að vinna sér sæti í enska landsliðinu.

„Ég er 100 prósent enn sami leikmaður og ég var í München," sagði hann og átti þá við þegar hann skoraði þrennu í 5-1 sigri enska landsliðsins á því þýska árið 2001.