Brown sagður valtur í sessi hjá Hull

Enska dagblaðið Daily Mirror segir að Phil Brown, stjóri Hull, sé nú að berjast fyrir starfi sínu hjá félaginu.

Fyrir ári síðan skoraði Brasilíumaðurinn Geovanni glæsilegt mark fyrir Hull er liðið vann 2-1 sigur á Arsenal á Emirates Stadium. Hull fór á mikið skrið í kjölfarið og undir lok októbermánaðar var liðið í þriðja sæti ensku úrvalsdeildarinnar.

Síðari hluti tímabilsins var hins vegar skelfilegur og Hull tókst að bjarga sæti sínu í deildinni með naumindum.

Hull hefur ekki byrjað vel í haust og er í næstneðsta sæti deildarinnar með fjögur stig. Liðið mætir Liverpool á morgun.

Hull verður að vinna einn af næstu fjórum leikjum sínum ef Brown ætlar að halda starfi sínu en Hull hefur aðeins unnið tvo deildarleiki síðan í desember í fyrra.

Phil Duffen, stjórnarformaður Hull, gagnrýnir þó þá stuðningsmenn sem hafi kallað eftir því að Brown verði rekinn nokkuð harkalega.

„Þetta er mjög sorglegt enda aðeins sex leikir búnir af tímabilinu," sagði Duffen. „Þetta er sá maður sem sá til þess að liðið komst af botni B-deildarinnar og upp í úrvalsdeildina. Mér finnst það viðbjóðslegt að fólk geti farið á knattspyrnuleiki og hrópað á knattspyrnustjórann eins og þeim sýnist."