Vinnu við byggingu Tónlistarhúss frestað

Starfsmenn Íslenskra aðalverktaka voru sendir heim frá vinnu sinni við Tónlistarhúsið í dag. ÍAV hafa ekki fengið greitt fyrir vinnu sína við húsið í þrjá mánuði.

Í tilkynningu frá ÍAV segir að síðustu mánuði hafi staðið yfir viðræður við Austurhöfn TR, sem er samstarfsvettvangur ríkis og Reykjavíkurborgar vegna byggingar og reksturs Tónlistarhúss, um kaup Austurhafnar á Eignarhaldsfélaginu Portusi sem er aðili að verksamningi við ÍAV um byggingu Tónlistarhússins.

Ekki hefur enn tekist að ljúka þessum viðræðum, en þær eru flóknar og snerta m.a. ríkið, Reykjavíkurborg, Gamla Landsbankann, Nýja Landsbankann auk ÍAV.

Verktakarnir segjast því tilneyddir að að fresta framkvæmdum sem hefjast áttu í dag að loknu jólaleyfi, meðan samningum hefur ekki verið lokið.

Á verkstað hafa unnið á þriðja hundrað starfsmenn ÍAV og undirverktaka auk þess sem fjöldi undirverkaka hefur unnið að verkinu víðar. Starfsmenn ÍAV munu tímabundið flytjast í önnur verkefni félagsins. ÍAV vonast til þess að framkvæmdir geti hafist á ný á næstu dögum.