Grunnur að endurreisn liggur í samstarfi við AGS

Þorgerður Katrín Gunnarsdóttir sagði, í umræðum um stefnuræðu forsætisráðherra á Alþingi, að mikilvægt væri að samhent ríkisstjórn starfi á þeim erfiðu tímum sem nú séu uppi. Hún óskaði því nýrri ríkisstjórn velfarnaðar í störfum sínum. Hún vonaði að ríkisstjórnin myndi halda vel á spöðunum þjóðinni til heilla.

„Sjálfstæðisflokkurinn ætlar í fyrsta sinn í langan tíma að bjóða upp á sterka og sameinaða stjórnarandstöðu," sagði Þorgerður. Hún benti á að Sjálfstæðisflokkurinn myndi leggja fram tvö þingmál, um greiðsluaðlögun og greiðslu úr viðbótarlífeyrissparnaði, sem höfðu verið tilbúin áður en fyrri stjórn var slitið.

Þorgerður sagði að grunnur að endurreisn efnahagslífsins lægi í samstarfinu við AGS, sem fæli í sér að vinna að endurreisn gjaldmiðilsins, að koma bankakerfinu á flot og aðhaldi í ríkisfjármálum. Fróðlegt væri að sjá hvernig ríkisstjórninni tækist upp við aðhald í ríkisfjármálum. Sjálfstæðisflokkurinn væri á móti því að velta álögum þjóðarbúsins yfir á heimilin með skattahækkunum

Þorgerður sagði að þrír mánuðir væru til kosninga. Það væri um það bil jafn langur tími og fyrri ríkisstjórn hafði frá hruni bankanna til stjórnarslita. Hin nýja ríkisstjórn geti því ekki komið sér undan verkum og borið við tímaskorti.