Ráðstöfunartekjur líklega vanmetnar

Raunverulegar ráðstöfunartekjur heimila eru líklega van­metnar í bráðabirgðamati Seðlabanka Íslands á fjárhagslegri stöðu heimilanna. Matið byggðist á staðgreiðslugögnum frá ríkisskattstjóra en ekki framtalsgögnum fólks. Ekki er því tekið tillit til vaxtabóta, barnabóta, meðlags og ýmissa verktakagreiðslna sem fólk kann að hafa.

Þetta kemur fram í svari forsætis­ráðherra við fyrirspurn Eyglóar Harðardóttur, Framsóknarflokki, um skýrslu Seðlabankans. Seðlabankanum var gert að svara fyrirspurninni.

Eygló spurði hvernig komist var að þeirri niðurstöðu í skýrslunni að 40 prósent af ráðstöfunartekjum heimilis sé viðráðanleg greiðslubyrði af föstum afborgunum lána.

Er því til svarað að viðmiðanir bankans séu í góðu samræmi við þær sem notaðar eru í öðrum löndum og bent á dæmi því til sönnunar.

Eygló spurði líka um samanburð á skuldastöðu íslenskra heimila við heimili í öðrum löndum. Í svarinu kemur fram að slíkur samanburður sé vandasamur en ef litið sé til heildarskulda í hlutfalli við heildar­ráðstöfunartekjur eða verga landsframleiðslu sjáist að fyrir bankahrunið voru íslensk heimili með þeim skuldugustu í hinum vestræna heimi. Aðeins dönsk og hollensk heimili hafi verið skuldsettari. Í samanburðinum var ekki tekið tillit til eigna á móti skuldum.- bþs