Sex ára raftónlistarmaður

Isis Helga Pollock er sex ára gamall raftónlistarmaður sem semur tónlist undir heitinu The Form. Hún heldur úti eigin MySpace-síðu þar sem fólk getur hlýtt á tónlist hennar.

Isis Helga er dóttir Tanyu Pollock tónlistarkonu og barnabarn Danny Pollock sem var einn Utangarðsmanna. Hún á því ekki langt að sækja hæfileikana og tónlistaráhugann.

Tanya segir dóttur sína alltaf hafa haft mikinn áhuga á tónlist. „Hún er alin upp á heimili þar sem tónlist er í gangi allan sólarhringinn; ef við erum ekki sjálf að semja og spila þá er verið að hlusta á tónlist í græjunum. Isis er græjunörd eins og ég og henni fannst ekkert mál að læra að semja tónlist á trommuheila,“ segir Tanya, sem sjálf hefur leikið á píanó frá unga aldri.

Isis hefur verið dugleg við að semja ný lög sem hún ætlar að taka upp eftir jól og segist einnig vilja gera tónlistarmyndbönd við lögin. „Ég vil gera vídeó við hvert einasta lag, það kemur í staðinn fyrir að spila á tónleikum. Ég er ekki tilbúin til þess ennþá, en kannski næsta sumar,“ segir Isis.

Þegar Isis er innt eftir því hvort hún hlakki til jólanna og jólagjafanna svarar hún því játandi. „Ég hlakka rosalega mikið til. Ég er líka með langan óskalista, mig langar til dæmis í krítartöflu, þríburakerru, He-man myndina eða leir sem hægt er að baka í ofninum,“ segir þessi hæfileikaríka unga stúlka. Raftónlistaraðdáendur eru minntir á Weirdcore-raftónlistarkvöld sem fram fer á Jacobsen 23. desember næstkomandi.sara@frettabladid.is