Annað tap Chelsea í þremur deildarleikjum

Chelsea á það nú á hættu að missa toppsæti ensku úrvalsdeildarinnar eftir að liðið tapaði, 2-1, fyrir Aston Villa á útivelli í ensku úrvalsdeildinni í dag.

Þetta er annað tap Chelsea í síðustu þremur deildarleikjum liðsins. Liðið tapaði einnig fyrir Wigan á útivelli í lok síðasta mánaðar. Chelsea vann svo Liverpool, 2-0, á heimavelli í millitíðinni og kom sér þá á topp deildarinnar.

Manchester United getur því með sigri á Bolton komið sér aftur á toppinn.

Didier Drogba kom Chelsea yfir með skoti á 15. mínútu leiksins. Brad Freidel, markvörður Villa, hefði hins vegar átt að verja skotið.

En leikmenn Aston Villa skoruðu tvívegis með skalla eftir hornspyrnur og tryggðu sér þar með sigurinn. Fyrst var Richard Dunne að verki á 32. mínútu. Sigurmarkið skoraði svo James Collins á 52. mínútu.

Með sigrinum kom Aston Villa sér upp í fimmta sæti deildarinnar og hoppaði þar með upp fyrir bæði Arsenal og Liverpool, um stundarsakir að minnsta kosti.

Emile Heskey var enn á varamannabekknum í liði Aston Villa og var byrjunarliðið óbreytt frá því að Villa gerði markalaust jafntefli við Manchester City fyrir tveimur vikum.

Petr Cech, Florent Malouda og Jose Bosingwa komu inn í byrjunarlið Chelsea og Joe Cole lék sinn fyrsta deildarleik síðan í janúar er hann kom inn á sem varamaður undir lok leiksins. En allt kom fyrir ekki.