Arshavin: Okkur skortir karakter

Andrei Arshavin segir að Arsenal spili fallega knattpsyrnu en liðið skorti karakter. Úr því þurfi að bæta ætli liðið sér að keppa um titla í ár.

Arshavin kom til Arsenal frá Zenit St. Pétursborg fyrr á þessu ári og hefur mikið látið til sín taka í Lundúnum.

Arsenal hefur hins vegar ekki unnið titil síðan þeir urðu bikarmeistarar vorið 2005.

„Arsenal spilar fallega knattspyrnu," sagði Arshavin. „Ef ég væri í liði sem beitti löngum spyrnum og ég væri bara í eltingarleik við boltann myndi ég aldrei brosa. En úrslitin skipta höfuðmáli í knattspyrnunni í dag."

„En það eina sem við þurfum að gera er að efla karakterinn í okkar liði. Við erum mjög vinalegir utan vallar en þurfum að bera meira traust hvor til annars í leikjum. Við þurfum að einnig að efla sjálfstrúna. Hún hefur verið að eflast undanfarið en betur má ef duga skal."