Varaforseti FIFA gagnrýnir herferð enskra til að halda HM 2018

England er á meðal þeirra þjóða sem vilja halda Heimsmeitaramótið í fótbolta árið 2018 og hafa til þessa reynt að auglýsa sig með ýmsum hætti.

Jack Warner, varaforseti alþjóða knattspyrnusambandsins FIFA, hefur þó ekki heillast sérstaklega af auglýsingaherferð Englendinga til þessa og segir þá alls ekki vera í forystunni í kapphlaupinu né heldur hafa einhvern guðdómlegan rétt til þess að halda mótið.

„England hefur allt til alls varðandi aðstæður og annað slíkt en Englendingar hafa ekki gert nóg til þess að sannfæra þá sem ákveða hvar keppnin verður haldin. Auglýsingaherferð þeirra er mjög gamaldags á meðan við erum að bíða eftir því að sjá eitthvað nýtt og spennandi. Eitthvað sem fangar athygli manns en það hafa Englendingar ekki gert," segir Warner í samtali við Sky Sports fréttastofuna.

Warner þessi gerði einmitt allt brjálað á Englandi árið 2007 þegar hann fullyrti að engum í Evrópu líkaði við England og þrátt fyrir að Englendingar hafi fundið upp fótboltann þá hafi þeir aldrei lagt neitt að mörkum til íþróttarinnar síðan þá.