Íhuga að kæra Ólaf F. fyrir fjárdrátt

„Málið er að þegar hann var borgarstjóri lét hann færa þetta fé á eigin reikning án samráðs við okkur," segir Guðjón Arnar Kristjánsson, formaður Frjálslynda flokksins.

Hann segir Ólaf F. Magnússon, fyrrum borgarstjóri Reykjavíkur, hafa látið greiða lögbundinn styrk borgarinnar til stjórnmálaflokka inn á reikning með sinni kennitölu í upphafi árs 2008 en ekki til Frjálslynda flokksins líkt og tíðkast hefur.

Ólafur F. klauf sig frá Frjálslynda flokknum í byrjun maí síðastliðnum og hefur starfað sem óháður borgarfulltrúi síðan þá.

„Allan tímann sem við höfum boðið fram í borginni hafa fjármunirnir runnið til Frjálslynda flokksins," segir Guðjón, og bætir við að flokkurinn hafi staðið straum af kostnaði, meðal annars vegna baráttunnar í aðdraganda síðustu borgarstjórnarkosninga. Frjálslyndir hafi reiknað með þessum styrk til að standa undir slíkum greiðslum.

Guðjón segist ekki viss um hversu háar fjárhæðir er um að ræða, en telur að þær gætu numið um þremur milljónum á ári. Hann segir fjármunina skipta flokkinn miklu máli til að laga skuldaumhverfi flokksins eftir kosningarnar.

„Við erum margbúin að ræða þetta mál við Ólaf F. en án árangurs," segir Guðjón. Þeir Guðjón og Helgi Helgason, formaður fjármálaráðs flokksins, sendu Hönnu Birnu Kristjánsdóttur borgarstjóra bréf þar sem þeir fóru fram á leiðréttingu greiðslunnar.

Hann útilokar ekki að leita liðsinnis lögreglu ef ekkert verður að gert, en á heimasíðu flokksins er framkvæmdastjórn flokksins sögð íhuga að kæra Ólaf til efnahagsbrotadeildar lögreglu.

„Það er náttúrulega skrefið sem við hljótum að skoða ef við fáum enga leiðréttingu samkvæmt þessum aðferðum. Við erum friðsamir menn og viljum gjarnan leysa þetta í góðu, en einhverstaðar þarf að skera úr þessu," segir Guðjón.