Viskí gegn svínaflensunni

Talsmaður samtaka rússneskra fótboltaáhugamanna vill ekki að ótti við svínaflensu hafi áhrif á stuðning við landslið Rússlands. Alexander Shprygin heitir maðurinn og ráðleggur Rússum að drekka viskí til varnar svínaflensunni.

Heilbrigðisstofnun Rússlands hefur varað fólk við að ferðast til Bretlandseyja af ótta við svínaflensusmit. Landslið Rússlands á útileik við Wales í næsta mánuði.

„Sagt er að þessi vírus sé mjög hættulegur en ég veit að ekkert skiptir meira máli en velgengni liðsins. Rússar hræðast ekkert svo þessi svínaflensa mun ekki koma í veg fyrir stuðning," sagði Shprygin.

„Við megum ekki vera án stuðnings í svona mikilvægum leik og því hvetjum við fólk til að fara til Wales þrátt fyrir þessa viðvörun. Til að minnka líkur á smiti þá ráðlegg ég fólki að drekka mikið af viskíi."