Sjeikinn á nú Manchester City einn

Mansour bin Zayed, arabíski furstinn sem keypti Manchester City síðastliðið sumar, hefur nú eignast félagið að fullu.

Mansour keypti félagið af Thaksin Shinawatra, fyrrum forsætisráðherra Tælands, sem hélt eftir tíu prósent eignarhlut fyrir sig.

Nú hefur hins vegar Mansour eignast þann hluta líka og ræður því yfir öllu félaginu. Þetta var staðfest í tilkynningu frá félaginu.

Mansour hefur eytt miklum fjármunum í leikmannakaup hjá City og boðið bestu knattspyrnumönnum heims áður óþekkt launakjör fyrir að koma og spila með félaginu.