Duttu Rússarnir í það daginn fyrir Slóveníuleikinn?

Það kom verulega á óvart að Slóvenía skyldi slá Rússa út í umspilinu fyrir HM. Ef upplýsingar rússneskrar sjónvarpsstöðvar eru réttar þá er ástæðan drykkjuskapur leikmanna liðsins en sjónvarpsstöðin heldur því fram að leikmenn hafi verið vel við skál langt fram undir morgun daginn fyrir leik.

Rússneska knattspyrnusambandið lítur þessar ásakanir afar alvarlegum augum og hefur beðið stöðina um upplýsingar vegna málsins svo hægt sé að kanna sannleiksgildi fréttarinnar.

Arsene Wenger, stjóri Arsenal, er með einn besta leikmann rússneska liðsins, Andrey Arshavin, í sínu liði og hann trúir ekki slíkri hegðun upp á sinn mann.

„Hann er alvörugefinn leikmaður og ég hef aldrei efast um hann. Ég trúi ekki orð af þessum fréttaflutningi. Miðað við hvernig hann undirbýr sig fyrir leiki er hann öðrum leikmönnum til fyrirmyndar," sagði Wenger.