Smáríki gegn GSM-sendum

 Þingið í Liechtenstein samþykkti í sumar að draga mjög úr leyfilegri hámarksgeislun frá GSM-sendum og eru mörkin þar orðin mun lægri en í nágrannalöndunum.

Einn staðall fyrir þessar geislanir er mældur með vöttum á fermetra. Liechtenstein ætlar að lækka leyfileg vött niður í 0,001 vatt á fermetra fyrir árið 2013.

Í Evrópusambandinu og á Íslandi er viðmiðið tíu vött á fermetra, en í Bretlandi 58. Liechtenstein var áður með sömu mörk og Sviss, 0,04 vött.

„Við þessar aðstæður verður ekki lengur hægt að að reka farsímakerfi,“ segir Christian Neuhaus, talsmaður símafyrirtækisins Swisscom. Fjögur stórfyrirtæki á símamarkaði hafa hótað að yfirgefa landið, þannig að þar yrði vart hægt að nota GSM-síma.

Breytingarnar hefðu í för með sér að sendarnir yrðu margfalt fleiri, og veikari hver og einn.

Þingið hefur brugðist við hótunum fyrirtækjanna með því að biðja ríkisstjórn landsins að athuga kosti ríkisrekins farsímakerfis, sem leigði síðan út sendigetu til einkafyrirtækja.

Þingið tók þessa ákvörðun með tilvísun til heilsufars almennings, en víða er deilt um hugsanlega skaðsemi GSM-bylgna. - kóþ