Air Atlanta bætir flugvélum við flotann

 Flugfélagið Air Atlanta mun bæta þremur Boeing 747-400-þotum í flota sinn á næstu tveimur mánuðum. Félagið hefur verið með eina til þrjár slíkar þotur í rekstri en þær verða nú fimm. Ráðning flugmanna stendur yfir og koma nokkrir þeirra úr röðum fyrrverandi starfsmanna Icelandair.

Air Atlanta er nú með um tuttugu þotur í rekstri, flestar af gerðinni Boeing 747 en nokkrar af gerðinni Airbus A300-600. Félagið sinnir verkefnum víða um heim, þar á meðal í Saudi-Arabíu, Malasíu og Sameinuðu furstadæmunum.

Að taka þrjár Boeing 747-400-þotur í notkun er stórt skref og kemur Air Atlanta aftur í fremstu röð flugfélaga á leiguflugsmarkaði á heimsvísu, segir í nýjasta fréttablaði Félags atvinnuflugmanna.

Þar segir jafnframt að þjálfun flugmanna á vélarnar sé lokið. Félagið er að ráða mannskap á aðrar vélar og eru meðal annars níu manns frá Icelandair að hefja störf hjá Air Atlanta um þessar mundir sem verktakar.

Forsvarsmenn fyrirtækisins eru bjartsýnir á framhaldið nú þegar vélarnar eru að fara í verkefni og sá kostnaður sem fylgir innleiðingu þeirra er að mestu að baki. - shá