Defoe brákaðist á hendi og fór úr lið á tveimur fingrum

Jermain Defoe, framherji Tottenham, verður ekki með liðinu á móti Bolton um helgina þar sem að komið er í ljós að hann handarbrotnaði í 5-0 sigri á Burnley um síðustu helgi. Defoe gæti einnig misst af næstu verkefnum enska landsliðsins.

„Hann fór úr liði á tveimur fingrum í leiknum á móti Burnley og það var ekki hægt að koma þeim aftur í lið. Hann brákaði einnig höndina og þurfti að eyða öllum laugardeginum á sjúkrahús. Honum líður ekki alltof vel þessa stundina," sagði Harry Redknapp, stjóri Tottenham.

„Hann verður vonandi orðinn góður fyrir næstu leiki enska landsliðsins en við verðum samt bara að bíða og sjá til með það," sagði Harry Redknapp.

Jermain Defoe hefur verið í miklu stuði á þessu tímabili en fjarvera hans ætti að gefa Peter Crouch tækifæri í byrjunarliðinu.