Sérstakir dómstólar fjalli um hrunmálin

 Lögmaður á þriðja tug erlendra banka sem stefndu ríkinu vegna yfirtöku á SPRON gagnrýnir íslenska dómstóla harðlega fyrir frávísun málsins. Hann segir þörf á sérstökum dómstólum til að fjalla um flókin mál sem tengjast hruninu.

Héraðsdómur Reykjavíkur vísaði í gær frá kröfu 25 erlendra banka á hendur Seðlabankanum, Fjármálaeftirlitinu (FME), fjármálaráðuneytinu og SPRON vegna yfirtöku FME á SPRON hinn 21. mars síðastliðinn.

Stefnendur, sem eru flestir þýskir bankar, kröfðust þess að dómstólar viðurkenndu skaðabótaskyldu ríkisins vegna yfirtökunnar á SPRON, sem þeir sögðu hafa verið óþarfa og skaðlega.

Baldvin Björn Haraldsson, lögmaður stefnenda, segir úrskurð héraðsdóms sýna svart á hvítu að íslenskir dómstólar séu ekki tilbúnir til að fást við flókin álitaefni sem upp hafi komið í kjölfar hrunsins, og hafi ekki þekkingu til að taka á alþjóðlegum lánasamningum. Hér sé máli vísað frá á forsendum sem Hæstiréttur hafi margoft staðfest að geti ekki verið grundvöllur frávísunar.

„Þessi niðurstaða kemur til með að hafa áhrif langt út fyrir þetta mál,“ segir Baldvin. Hún verði fráleitt til þess að efla trú erlendra aðila á því að íslenskir dómstólar geti fjallað af fagmennsku um mál tengd hruninu.

„Þetta staðfestir þá skoðun mína að það þurfi að setja upp sérstaka dómstóla til að fjalla um bankahrunið og afleiðingar þess. Það þarf dómara með mikla sérþekkingu til að taka á þessum málum,“ segir Baldvin.

Hann segir stefnendur nú þurfa að ákveða næstu skref í málinu. Meta þurfi hvort það skili einhverju að kæra frávísunina til Hæstaréttar, enda myndi dómurinn væntanlega senda málið aftur til héraðsdóms, og þá til sama dómara. Eins geti komið til greina að kæra að nýju vegna málsins. Þá þurfi að skoða möguleika á málshöfðun annars staðar en á Íslandi.

Í úrskurði héraðsdóms kemur fram að dómari hafi talið kröfur stefnenda vanreifaðar. Ekki var að mati dómsins afmarkað hvernig tjón vegna yfirtöku ríkisins á sparisjóðnum eigi að hafa orðið, né hafi verið sýnt fram á kröfur þeirra í þrotabú SPRON í gegnum lánasamninga. Þá átaldi dómari stefnendur fyrir að leggja fram mikinn fjölda skjala á ensku, sem bryti gegn ákvæðum laga um að skjöl skuli lögð fram á íslensku.

Héraðsdómur úrskurðaði að stefnendum bæri að greiða stefndu alls tvær milljónir króna í málskostnað.

brjann@frettabladid.is