Lán lengjast mest um þrjú ár

Greiðslubyrði af öllum íbúða- og bílalánum mun léttast um næstu mánaðamót. Aðgerðir í þá veru voru kynntar í félagsmálaráðuneytinu í gær.

Greiðslubyrðin verður færð aftur til þess sem hún var á tilteknum dagsetningum á síðasta ári. Verðtryggð lán munu miðast við 1. janúar 2008 og gengistryggð lán við 1. maí 2008. Það sem út af stendur af afborgununum bætist við höfuðstólinn og þar með lengist lánstíminn.

Þak verður hins vegar sett á lánstímann, þannig að hann lengist ekki meira en um þrjú ár. Til stendur að afskrifa afganginn og að lánastofnanirnar beri þann kostnað.

Greiðslubyrðin mun síðan þyngjast á ný í samræmi við launavísitölu og aukið atvinnustig.

Þessi úrræði verða valkvæm, sem þýðir að þeir sem treysta sér til að greiða af láninu eins og upphaflega var gert ráð fyrir, og vilja ekki lengja lánstímann, geta gert það áfram. Ekki liggur enn fyrir hvort fólk mun sérstaklega þurfa að bera sig eftir úrræðinu, eða hvort það mun þurfa að segja sig frá því.

Þá verður einnig boðið upp á sértæk úrræði fyrir fólk í verulegum greiðsluvanda. Annars vegar er þar um að ræða úrræði sem kallað er greiðslujöfnun plús, og kemur til viðbótar hinni hefðbundnu greiðslujöfnun sem lögfest var fyrir tæpu ári. Þar verður tekið mið af stöðu hvers og eins og greiðslubyrðin sniðin að hans þörfum.

Hins vegar munu lánastofnanir bjóða upp á sértæka skuldaaðlögun, sem byggist á mati á greiðslugetu til lengri tíma og er ætluð fólki sem ekki dugir almenn leiðrétting.

Þar að auki verður opinber greiðsluaðlögun endurbætt með nýju lagafrumvarpi og vankantar sniðnir af frumvarpinu.

Árni Páll sagði einnig á blaðamannafundinum í gær að til stæði að breyta lögum um Íbúðalánasjóð, meðal annars til að forðast fasteignabólur.

Ráðherranefnd félagsmála-, dómsmála- og viðskiptaráðherra ræddi í þaula þá hugmynd að færa öll íbúðalán til Íbúðalánasjóðs til að auðvelda það að bjóða upp á samræmd úrræði. Af því varð hins vegar ekki.

Spurður hvað olli því sagði Árni Páll að lendingin hefði einfaldlega orðið sú að fara aðra leið í bili. „Bankarnir vildu vinna þetta með þessum hætti,“ sagði Árni. Samkvæmt heimildum Fréttablaðsins hefur sú leið þó ekki enn verið slegin alfarið út af borðinu.

stigur@frettabladid.is