Wenger búinn að setja met hjá Arsenal

Arsene Wenger er nú orðinn sá stjóri sem hefur verið lengst við stjórnvölinn hjá Arsenal. Wenger er nú búinn að sitja í stólnum í meira en þrettán ár og hefur með því bætt met George Allison sem var stjóri Arsenal frá 1934-1947.

Það var David Dein, fyrrum vara-stjórnaformaður hjá Arsenal, sem var maðurinn á bak við það að fá Frakkann til Highbury árið 1996 og voru margir ekki alltof vissir um réttmæti þess. Wenger kom til Arsenal frá Japan en var fljótur að stimpla sinn og Arsenal vann tvöfalt á hans fyrsta heila tímabili.

„Hans arfur verður sá að hann breytti fótboltafélaginu Arsenal. Hann er búinn að fara með félagið á allt annað stig og hefur gert það með því að láta liðið spila mjög skemmtilegan fótbolta," sagði David Dein við Sky Sports og sagði einnig frá því að Wenger hafi hreinlega breytt öllu í lífi leikmanna þegar hann kom til Arsenal.

„Hann var mjög eftirsóttur, Bayern Munchen vildi meðal annars fá hann og ég var mjög ánægður þegar hann ákvað að koma til okkar," rifjaði Dein upp. "Hann er svo sérstakur á marga vegu. Hann er yfirvegaður og örugglega besti stjórinn sem ég hef séð. Hann er mikill hugsuður og honum tekst að tala sjálfstraust í alla," sagði Dein.