Þóknun til lögmannsstofu alltof há

Þóknun sem lögmannsstofan Lögmál innheimti af brunatryggingu hjá Tryggingamiðstöðinni (TM) er tæplega sjöfalt hærri en lög gera ráð fyrir. Þetta er mat Lögmanna-félagsins og talsmanns neytenda.

Fréttablaðið sagði frá því á þriðjudaginn að maður sem skuldaði 1.549 krónur í brunatryggingu hjá TM fékk rukkun upp á 14.613 krónur, eftir að upphæðin fór í innheimtu. Samkvæmt nýlegri reglugerð var sett þak á innheimtuþóknanir. Ef höfuðstóll er undir 3.000 krónum má þóknun vera hæst 1.250 krónur.

Ingimar Ingimarsson, framkvæmdastjóri Lögmannafélagsins, telur að í máli eins og þessu sé um milliinnheimtu að ræða og því hefði einungis mátt rukka 1.250 krónur. Með milliinnheimtu er átt við það þegar skuldari hefur fengið innheimtuviðvörun en löginnheimta ekki hafin. Gerir hann ráð fyrir að senda lögmönnum áréttingu um gildissvið nýju reglugerðarinnar sem tók gildi 1. febrúar.

Segir Ingimar þetta í annað sinn sem Lögmannafélagið hafi orðið vart við misskilning lögmanna frá því að reglugerðin tók gildi.

Elvar Örn Unnsteinsson, einn eigenda Lögmáls, er ósammála túlkun Lögmannafélagsins og talsmanns neytenda. Segir hann að þegar umbjóðandi hans, í þessu tilviki TM, hafi varað skuldara við þrisvar sinnum sé innheimtubréf lögmanns löginnheimta.

Gísli Tryggvason, talsmaður neytenda, segir að löginnheimta sé aðeins þegar mál sé komið til sýslumanns eða dómstóla og hægt sé að grípa til úrræða eins og fjárnáms.

„Ég vona að svona misskilningur eins og þessi tíðkist ekki almennt en ég hafði veður af því fyrr í vor að einhverjar lögmannsstofur kynnu að hafa misskilið þetta," segir Gísli Tryggvason sem taldi ástæðu til að leiðrétta þennan misskilning í kjölfar fréttar Fréttablaðsins á þriðjudaginn.

Gísli hefur beint því til Lögmannafélagsins að minna lögmenn á gildissvið innheimtulaganna. Hægt er að skjóta málum er varða innheimtukostnað til úrskurðarnefndar lögmanna.

vidir@frettabladid.is