Zenden vongóður um að ganga í raðir Sunderland

Hinn 33 ára gamli Boudewijn Zenden hefur æft með Sunderland undanfarna viku og vonast til þess að verða boðinn samningur hjá félaginu en þessi fyrrum landsliðsmaður Hollands er fáanlegur á frjálsri sölu eftir að samningur hans við Marseille rann út í sumar.

„Það kemur í ljós í lok næstu viku hvort að mér verði boðinn samningur eða ekki en ég er nokkuð viss um að ég hafi heillað þjálfarana hingað til. Ég er líka ánægður með dvöl mína hjá Sunderland því þetta er flott og vel skipulagt félag með frábæra æfingaraðstöðu.

Það er bara verst að út af landsleikjapásunni eru fáir leikmenn eftir til þess að æfa með en það breytir engu um það að ég er að leggja mig hundrað prósent fram í öllu sem ég geri hér," segir þessi fyrrum leikmaður Liverpool, Chelsea og Barcelona.