Grant í viðræðum við Red Bulls en valdi Portsmouth

Umboðsmaður Avram Grant, fyrrverandi stjóra Chelsea og nýráðins yfirmanns knattspyrnumála hjá Portsmouth, hefur viðurkennt að Ísraelinn hafi átt í viðræðum við bandaríska MLS-deildarfélagið New York Red Bulls áður en hann ákvað að snúa aftur til Englands.

Til stóð að Grant myndi taka við sameiginlegu hlutverki knattspyrnustjóra og yfirmanni knattspyrnumála hjá félaginu sem er með versta árangur allra liða í deildinni þegar þrír leikir eru eftir.

„Grant hafði áhuga á starfinu og ég er sannfærður um að hann hefði gert frábæra hluti þarna ef hann hefði fengið tækifæri til þess. Hann gat hins vegar ekki beðið endalaust á meðan forráðamenn Red Bulls voru að draga lappirnar," sagði umboðsmaðurinn Don Barnett í viðtali við New York Times.