Skaðabótamál gegn stjórnendum skoðað

Kjartan Gunnarsson, fyrrverandi framkvæmdastjóri Sjálfstæðisflokksins, fyrrverandi bankastjórar Landsbankans og aðrir stjórnarmenn gætu þurft að greiða skaðabætur úr eigin vasa til íslenska ríkisins vegna Icesave - ákveði stjórnvöld að höfða skaðabótamál á hendur þeim.

Í nefndaráliti meirihluta fjárlaganefndar um Icesave - sem þingmenn skeggræddu í dag - er lagt til að ríkisstjórninni verði falið að gera ráðstafanir til að þeir sem kunna að bera ábyrgð á tilurð Icesave reikninganna, axli fjárhagslega ábyrgð á þvi tjóni sem af hefur hlotist fyrir ríkið.

Með öðrum orðum að skoðað verði að fara í skaðabótamál við til dæmis þá sem stjórnuðu Landsbankanum fyrir hrun, þ.e. bankastjórana, þá Sigurjón Þ. Árnason og Halldór Kristjánsson, og stjórnarmenn, þau Björgólf Guðmundsson, Þór Kristjánsson viðskiptafélaga Björgólfs, Þorgeir Baldursson forstjóra Odda, Svöfu Grönfeldt rektor Háskólans í Reykjavík og Kjartan Gunnarsson, framkvæmdastjóra Sjálfstæðisflokksins til áratuga.

Innan við vika er síðan sá síðastnefndi skrifaði opnugrein í Morgunblaðið þar sem hann gagnrýnir Icesave samninginn harkalega og sakar núverandi stjórnvöld um "að binda þjóðinni drápsklyfjar með skuldum sem ríkið bar ekki ábyrgð á."

Nú virðist hins vegar ekki útilokað að ríkisstjórnin freisti þess að sækja bætur meðal annars í vasa Kjartans til að létta á þessum drápsklyfjum. Fréttastofa ræddi í dag við fjölda lögmanna og bar þeim saman um að ekkert í íslenskum lögum komi í veg fyrir að ríkið geti reynt að sækja skaðabætur til einstaklinga vegna Icesave, ef sannað þyki að tjónið sem almenningur situr uppi með sé afleiðing af ásetningi eða gáleysi stjórnenda og stjórnarmanna.

Sambærilegt mál hefur nú þegar verið höfðað í Danmörku þar sem slitastjórn Hróarskeldubanka krefst skaðabóta frá fyrrverandi bankastjóra bankans.

Að sögn lögfræðinga er ekki ólíklegt að hér væri hægt að höfða mál á grunni hlutafélagalaga þar sem segir meðal annars að stofnendur og stjórnarmenn séu skyldir að bæta hlutafélagi tjón, er þeir hafa valdið félaginu í störfum sínum, hvort sem er af ásetningi eða gáleysi. Sama gildi þegar hluthafi eða aðrir verði fyrir tjóni.