Sparnaðaraðgerðir draga úr öryggi

Þær miklu sparnaðaraðgerðir sem grípa þarf til á Landspítalanum þýða bæði minna öryggi fyrir sjúklinga og verri heilsu þjóðarinnar. Þetta segir Hjördís Þórey Þorgeirsdóttir formaður félags ungra lækna og leggur áherslu á að haft sé samráð við þá sem sinna sjúklingnum þegar skorið er niður.

Hætta sé á að sumar þeirra aðgerða sem gripið verði til dragi ekki úr kostnaði þegar upp sé staðið heldur auki hann.

Á þessu ári þarf Landspítalinn að spara 2,6 milljarða króna og því ljóst að grípa þarf til umfangsmikilla sparnaðaraðgera sem sem munu líklega fela í sér að loka þarf deildum og draga úr þjónustu spítalans. Starfsfólk spítalans hefur miklar áhyggjur af þeim aðgerðum sem gripið verður til. Hjördís Þórey Þorgeirsdóttir formaður félags ungra lækna telur að það dragi úr öryggi sjúklinga.

Hún segir mikilvægt að haft sé samráð við þá sem sinna þeim verkefnum sem á að breyta eða leggja niður til að átta sig á hvaða áhrif breytingarnar hafi.