Jóhanna ætlar ekki að vanda um fyrir Ólafi Ragnari

Jóhanna Sigurðardóttir forsætisráðherra ætlar ekki að biðja Ólaf Ragnar Grímsson forseta að gæta orða sinna í framtíðinni. Þetta kom fram hjá Jóhönnu á blaðamannafundi í Þjóðmenningarhúsinu í dag. Orð forsetans hafa verið nokkuð í umræðunni undanfarið en hann hefur tvívegis á skömmum tíma þurft að bera til baka ummæli sem höfð hafa verið eftir honum í erlendum fjölmiðlum.

Þá ollu ummæli sem forsetinn lét falla á fundi með sendiherrum hér á landi fyrir jól nokkru fjaðrafoki. Eiður Guðnason fyrrverandi sendiherra skrifaði grein í Morgunblaðið í gær þar sem forsetinn var sakaður um að segja ósatt í sambandi við það mál.

Steingrímur J. Sigfússon fjármálaráðherra sagði á sama fundi í dag að það væri dapurlegt að samskipti fyrrverandi sendiherra og forsetans séu með þeim hætti sem raun ber vitni um. Jóhanna samsinnti því.