Eyddu margföldum sparnaði Landspítalans í lúxus

Stjórnendum Landspítalans er gert að spara tvo komma sex milljarða króna á þessu ári og útlit er fyrir að það sé bara byrjunin. Það eru þó smáaurar miðað við tölurnar sem tengjast landvinningum útrásarvíkinga síðustu misseri.

Á meðan góðærið stóð sem hæst voru tölur líkt þessi, tveir komma sex milljarðar króna, ekki óalgengar en þá í allt öðru samhengi en við sparnað.

Þannig keyptu Jón Ásgeir Jóhannesson og Ingibjörg Pálmadóttir lúxussnekkju á árinu 2007. Kaupverðið fékkst ekki gefið upp en sérfræðingar sem vel þekkja til telja að verð hennar hafi verið um tveir milljarðar króna.

Fleiri fjárfestu í íbúðum erlendis. Bakkabróðirinn Lýður Guðmundsson keypti sér íbúð í Lundúnum árið 2007. Íbúðin var á lista yfir tíu dýrustu húseignir þar í borg á þeim tíma og kostaði 12 milljónir punda eða tæpa tvo milljarða króna á núverandi gengi.

Jón Ásgeir og Ingibjörg keyptu sér svo lúxusíbúð í New York í fyrra. Íbúðin var sett á sölu í síðustu viku og er verðið tveir komma níu milljarðar króna, eða nálægt þeirri upphæð sem spara á í heilbrigðiskerfinu.

Þá er áætlað er að einkaþotufloti íslenskra auðmanna á síðasta ári hafi verið um fimmtán milljarða króna virði. Á meðal þeirra er þota í eigu Bakkabræðra sem metin var á þrjá milljarða króna.

Kaup Íslendinga á sögufrægum byggingum og verslunum í Kaupmannahöfn, eins og Magasin du Nord og Illum, vöktu blendin viðbrögð í hjá Dönum sem hristu haus yfir öllu því sem Íslendingar keyptu þar í landi. Haustið 2007 keypti íslenska félagið Nordic Partners dönsku hótelkeðjuna Remmen Hotels. Kaupverð fékk ekki uppgefið en heimildir voru fyrir því að það væri á bilinu 15 til 20 milljarðar íslenskra króna. Aðalhótelið í keðjunni er hið sögufræga Hotel D'Angleterre sem er einn af gimsteinum Kaupmannahafnar.