West Ham gæti þurft að spila leik fyrir luktum dyrum

Einum mánuði eftir óeirðirnar á leik erkifjendanna West Ham og Millwall í enska deildarbikarnum á Upton Park mun enska knattspyrnusambandið vera nálægt því að kveða dóm sinn í málinu.

Ólæti innan vallar sem utan urðu til þess að stuðningsmaður Millwall slasaðist lífshættulega og hersing af stuðningsmönnum West Ham réðst inn á völlinn meðan á leiknum stóð eftir að West Ham hafði komist yfir í framlengingu.

West Ham gæti átt á hættu að þurfa að spila einn leik fyrir luktum dyrum og þá munu bæði félög verða sektuð fyrir framkomu stuðningsmanna sinna.

Ef að framkoma af þessu tagi endurtekur sig gæti enska knattspyrnusambandið dregið stig af félögunum.