Owen á ekki von á góðum mótttökum á Anfield

Michael Owen á ekki von á því að honum verði vel tekið af stuðningsmönnum Liverpool þegar hann mætir á Anfield með Manchester United um næstu helgi.

Owen var á mála hjá Liverpool í átta ár og var einn allra vinsælasti leikmaður félagsins.

„Auðvitað myndi ég vilja að fólk myndi fyrst og fremst hugsa til þess sem ég gerði fyrir félagið á sínum tíma," sagði Owen í samtali við enska fjölmiðla. „En ef ég skoða þetta með raunhæfum augum á ég ekki von á miklu fyrst ég er byrjaður að spila fyrir erkifjendur stuðningsmanna Liverpool."

Hann segir þó að málið blasi öðruvísi við sér en hinum almenna stuðningsmanni.

„Mönnum er tíðrætt um hollustu í knattspyrnu," sagði Owen. „Sjálfur er ég fjölskyldumaður og eiga þessi gildi ekki síst við mig. En ég er knattspyrnumaður og ekki stuðningsmaður. Ég þarf að afla mér viðurværis og sjá fyrir minni fjölskyldu. Þetta var atvinnutækifæri eins og hvert annað."