Útgefandinn staðfestir ráðningu Davíðs og Haraldar - 40 missa vinnuna

Óskar Magnússon útgefandi Morgunblaðsins staðfestir að Davíð Oddsson og Haraldur Johannessen hafi verið ráðnir ritstjórar Morgunblaðisins í yfirlýsingunni sem hann hefur sent frá sér.

Í yfirlýsingunni kemur fram að Davíð hafi skýra framtíðarsýn og rödd hans hafi ætíð náð eyrum þjóðarinnar. Haraldur Johannessen, sem er hagfræðingur frá Háskóla Íslands, komi til blaðsins úr ritstjórastól Viðskiptablaðsins sem hann hafi stýrt af öryggi og fagmennsku. Árvakur vænti mikils af framlagi þessara öflugu einstaklinga sem raunar hafi báðir starfað áður hjá Morgunblaðinu, þó mislengi sé og á ólíkum tímum.

Davíð var þingfréttaritari á Morgunblaðinu 1973-1974. Haraldur var blaðamaður á viðskiptablaði Morgunblaðsins á árunum 2000 til 2004.

Starfsfólki Morgunblaðsins fækkar um 40 manns við þær skipulagsbreytingar sem voru kynntar í dag. Þrjátíu starfsmönnum er sagt upp en þar að auki eru 10 lausráðnir blaðamenn sem fá ekki framlengingu á starfstíma sínum. Flestir hverfa af ritstjórninni eða 19 af 104 sem hafa starfað þar að undanförnu, eftir því sem fram kemur í tilkynningu frá Óskari.