Jafntefli hjá Reading

Reading og Watford gerðu í dag 1-1 jafntefli í Íslendingaslag í ensku B-deildinni.

Ívar Ingimarsson og Gylfi Þór Sigurðsson voru í byrjunarliði Reading en Ívar var að spila í fyrsta sinn í byrjunarliði síðan í janúar.

Brynjar Björn Gunnarsson kom inn á sem varamaður fyrir Gylfa Má snemma í síðari hálfleik. Heiðar Helguson lék ekki með Watford vegna meiðsla.

QPR vann 5-2 stórsigur á Barnsley en Emil Hallfreðsson var ekki í hópnum hjá síðarnefnda liðinu að þessu sinni.

Aron Einar Gunnarsson kom inn á sem varamaður í hálfleik er Coventry gerði 2-2 jafntefli við Middlesbrough. Staðan var 2-0 fyrir Boro í hálfleik en Coventry skoraði sín mörk á síðasta stundarfjórðungnum.

Newcastle getur komið sér á topp deildarinnar með sigri á Ipswich en leikurinn er nýhafinn þar sem að topplið West Brom tapaði óvænt fyrir Crystal Palace á heimavelli í dag.

Í ensku C-deildinni kom Ármann Smári Björnsson inn á sem varamaður í síðari hálfleik er hans lið, Hartlepool, vann 3-0 sigur á Walsall. Hartlepool er í ellefta sæti deildarinnar.