Mannone hetja Arsenal

Arsenal vann í dag 1-0 sigur á Fulham á útivelli en það var markvörðurinn Vito Mannone sem var hetja Arsenal í leiknum í dag.

Markvörðurinn ítalski varði oft glæsilega í leiknum, til að mynda í tvígang frá Andrew Johnson af stuttu færi. Þá varði hann einnig gott skot Zoltan Gera.

Fulham var síst lakari aðilinn í leiknum en það var Robin van Persie sem skoraði eina mark leiksins eftir fyrirgjöf Cesc Fabregas.

Þetta var þriðji leikur Mannone í ensku úrvalsdeildinni en hann er 21 árs gamall. Manuel Almunia gat ekki spilað með Arsenal í dag þar sem hann er veikur.