Fundaði með utanríkisráðherrum Breta og Hollendinga

Össur Skarphéðinsson utanríkisráðherra, David Miliband, utanríkisráðherra Bretlands, og Maxime Verhagen, utanríkisráðherra Hollands, áttu í gær formlegan fund í höfuðstöðvum Sameinuðu þjóðanna í New York.

Í tilkynningu frá utanríkisráðuneytinu kemur fram að ráðherrarnir hafi rætt stöðu Icesave-málsins og utanríkisráðherra hafi meðal annars farið yfir fyrirvara Alþingis. Utanríkisráðherra fór yfir efnahagsáætlun ríkisstjórnarinnar sem unnin er í samvinnu við Alþjóðagjaldeyrissjóðinn og ítrekaði mikilvægi þess að ekki yrðu frekari tafir á endurskoðun áætlunarinnar.