Andrey Arshavin: Ennþá í sjokki eftir HM-klúðrið

Andrey Arshavin hjá Arsenal hefur viðurkennt að hann sé ekki enn kominn yfir það að rússneska landsliðinu hafi mistekist að komast á HM í Suður-Afríku. Rússar duttu úr leik eftir 1-0 tap á móti Slóveníu í seinni umspilsleiknum og töpuðu einvíginu á færri mörkum á útivelli.

„Það er ennþá mjög erfitt fyrir mig að tala um HM. Ég er ennþá í sjokki," sagði Andrey Arshavin í viðtali við leikskrá Arsenal-liðsins. „Ég verð samt að viðurkenna að Slóvenar áttu sigurinn skilinn. Við verðum að vera áfram jákvæðir en það er auðvelt að segja en afar erfitt að standa við," sagði Arshavin.

„Ég veit ekki enn hvað gerðist hjá okkur. Þetta hefði samt orðið miklu auðveldara fyrir okkur ef að við hefðum ekki fengið á okkur þetta mark í lokin á fyrri leiknum í Rússlandi . Það þýðir samt ekkert að velta sér upp úr þessu núna," bætti þessi skemmtilegi Rússi við.