Nýtt tónlistarblað lítur dagsins ljós

Nýtt tónlistarblað, Hljómgrunnur, kemur út í fyrsta sinn með Fréttablaðinu á morgun á degi íslenskrar tónlistar. Samtök tónlistarrétthafa á Íslandi, Samtónn, standa á bak við blaðið, sem ætlunin er að komi út mánaðarlega. Ritstjóri verður Pétur Grétarsson, sem hefur haft umsjón með Íslensku tónlistarverðlaununum.

„Við höfum gert þetta í kringum stórviðburði eins og Íslensku tónlistarverðlaunin að koma út sérblaði," segir Pétur. „Þetta er aðallega hugsað sem minnismiði til fólks um þetta frábæra tónlistarlíf í landinu og við viljum senda það út í áþreifanlegu formi öðru hverju." Listi verður yfir tónlistarviðburði í blaðinu þar sem fólk getur fengið gott yfirlit yfir allt það helsta sem verður í boði þann mánuðinn.

Þessi nýi fjölmiðill verður kynntur enn frekar á fundi Samtóns á morgun. Þar verður einnig kynnt hver hlýtur Bjarkarlaufið í ár, auk þess sem nafnið á nýja tónlistar- og ráðstefnuhúsinu verður opinberað.

Nýtt fyrirkomulag Íslensku tónlistarverðlaunanna verður sömuleiðis kynnt. Nú þurfa flytjendur ekki lengur að borga með tilnefningum sínum en á síðasta ári nam gjaldið níu þúsund krónum fyrir hverja plötu sem var send inn. Plötufyrirtækið Kimi Records ákvað af þessum sökum að sniðganga verðlaunin í byrjun ársins vegna þessa. „Þetta er miklu eldri umræða. Við höfum verið að leita leiða til að fella gjöldin niður en öll umræða hefur áhrif," segir Pétur. Peningurinn vegna tilnefninganna var notaður í fjármögnun fyrir verðlaunahátíðina og því stendur fjáröflun yfir hjá Pétri og samstarfsmönnum til að fá aukinn pening.

„Við þurfum að finna nálægt milljón annars staðar," segir hann. „Þetta er mjög þungur pakki. Allt sem kostar peninga er flókið í dag." Tónlistarverðlaunin verða afhent í sextánda sinn í Þjóðleikhúsinu 3. mars næstkomandi. - fb