Stónsmenn bragða kæsta skötu

Hljómsveitin Stóns heldur tvenna tónleika um helgina. Þeir fyrri fara fram í kvöld á Græna hattinum á Akureyri og þeir seinni annað kvöld á Sódómu í Reykjavík. Blaðamaður hitti þá á Þremur frökkum og lét þá smakka kæsta skötu. Enda ekki á hverjum degi sem Stóns fá sér skötu.

Það eru þeir Bjarni Sigurðarson (Keith Richards), Frosti Runólfsson (Charlie Watts) og Björn Stefánsson (Mich Jagger), sem bíða spenntir eftir matnum. „Þetta er í fyrsta sinn sem við spilum á Akureyri og í annað sinn sem við spilum á Sódómu. Við erum þar með búnir að brjóta þá reglu að spila aldrei á sama stað oftar en einu sinni,“ segir Frosti, trommuleikari sveitarinnar.

Þegar skatan er borin á borð slær þögn á hópinn. Hvorki Frosti né Bjarni hafa bragðað á þessum þjóðarrétti Íslendinga og virðast tregir til að smakka. Það er aðeins Björn sem tekur strax til matar síns enda vanur maður á ferð.

„Það er sama lykt af þessu og var af hárinu á mér þegar ég aflitaði það síðast. Það er einhvers konar ammoníak-lykt af þessu,“ segir Frosti sem smakkar einn bita. Bjarni samsinnir þessu. „Þetta er algjör viðbjóður. Þá kýs ég heldur gömlu góðu smalabökuna. Við erum greinilega ekki nógu miklir menn fyrir þetta.“

Þegar hér er komið sögu hefur Björn lokið við fyrri skammtinn og biður kurteislega um meira. „Ég er að fíla þetta. Þetta er hollt og hreinsar líkamann af óþverra og svo hef ég heyrt að þetta bæti ónæmiskerfið,“ segir hann.

Þegar blaðamaður spyr hvort þeir telji að þeir muni einhvern tímann bragða skötu aftur útiloka þeir það ekki. „Þetta er gott sport. Ég verð líka búinn að gleyma deginum í dag á morgun,“ segir Bjarni Tónleikarnir á Græna hattinum hefjast 22.00 í kvöld og tónleikarnir á Sódómu Reykjavík hefjast klukkan 24.00 annað kvöld. - sm