Heskey: Sagði aldrei að ég vildi yfirgefa Aston Villa

Framherjinn Emile Heskey hjá Aston Villa hefur þvertekið fyrir að hafa sagst vilja yfirgefa herbúðir Aston Villa til þess að auka möguleika sína á að vinna sér sæti í landsliðshópi Fabio Capello hjá Englandi fyrir lokakeppni HM 2010.

„Ég sagði aldrei að ég vildi hætta hjá Aston villa. Knattspyrnustjórinn veit alveg hvernig karakter ég er og þó svo að ég hafi talað við hann til að útskýra mál mitt þá held ég að hann hafi hvort sem er ekkert trúað því sem var skrifað í blöðunum.

Ég hef aldrei hlaupið í burtu frá vandamálum heldur lít ég á þetta sem mikla áskorun til að sanna mig að nýju. Það kemur svo bara í ljós hvort að ég geri nógu mikið til þess að komast í landsliðshópinn fyrir lokakeppnina," segir Heskey í viðtali á opinberri heimasíðu Aston Villa.