Tvíkynhneigður kennari slær í gegn

X-Factor-söngþættirnir hafa notið gífurlegra vinsælda í Bretlandi og hófst sjötta þáttaröðin þar í landi á laugardaginn. Fyrstu þættirnir eru yfirleitt misgóðir og bjuggust fáir við að sjá hugsan­legan sigurvegara stíga á svið í fyrsta þættinum.

Það ætlaði því allt um koll að keyra þegar 27 ára dans- og leiklistarkennari að nafni Danyl Johnson söng Joe Cocker-útgáfuna af With a Little Help From My Friends.

Tilþrifin voru slík að hann náði áhorfendum í salnum á sitt band á fyrstu sekúndum lagsins og söng sig inn í hug og hjörtu dómaranna Simons Cowell, Dannii Minogue, Louis Walsh og Cheryl Cole sem stóðu öll upp til að klappa honum lof í lófa. Cowell, sem er þekktur fyrir hreinskilni og dómhörku, fullyrti að frammistaða Danyls væri besta fyrsta prufa sem hann hefði séð síðan hann hóf að dæma í American Idol 2001.

Í viðtali við Daily Mirror segist Danyl ekki eiga orð yfir viðbrögðunum sem hann fékk, en hann beið í fjórtán klukkutíma eftir að komast í prufurnar í O2 Arena í London.

Aðspurður segist hann vera á lausu og ætla að einbeita sér alfarið að keppninni á komandi vikum, en hann fer ekki leynt með tvíkynhneigð sína og segir nægan tíma til að hitta draumaprinsinn eða -prinsessuna síðar.

Mörg hundruð þúsund manns hafa þegar horft á upptökuna af prufu Danyls á Youtube og er hann af mörgum talinn vera „næsta Susan Boyle“ sem sló svo eftirminnilega í gegn í þættinum Britain‘s Got Talent. -ag