Ferguson: Rooney getur orðið einn sá besti í heimi

Alex Ferguson, stjóri Manchester United, segir að Wayne Rooney geti auðveldlega orðið einn að bestu knattspyrnumönnum heimsins.

United mætir Wolfsburg í Meistaradeild Evrópu í kvöld og sagði Ferguson á blaðamannafundi í gær að Rooney hefði allt til brunns að bera til að verða einn sá besti í heimi.

„Hann getur auðveldlega komist í þann hóp," sagði Ferguson. „Hann er ákveðnum hæfileikum gæddur sem aðeins frábærir knattspyrnumenn búa yfir."

„Hann var bara krakki þegar við sömdum við hann og við héldum að hann myndi verða að leikmanni sem væri í hæsta gæðaflokki. Hann er afar ákveðinn og það sést vel í hverjum leik og á hverri æfingu. Það mun aldrei breytast."

Rooney var átján ára gamall þegar hann kom til United frá Everton árið 2004 og hefur síðan þá unnið þrjá enska meistaratitla með félaginu og einu sinni orðið Evrópumeistari með því.

Hann var í tíunda sæti í kjöri á knattspyrnumanni ársins fyrir fimm árum síðan og er það hans besti árangur í því kjöri. Það eru landsliðsþjálfarar og -fyrirliðar sem hafa atkvæðisrétt í kjörinu og hlaut Rooney ekkert atkvæði í kjöri síðasta árs.

Hann hefur hins vegar blómstrað hjá United á tímabilinu og skorað sjö mörk í fyrstu níu leikjum tímabilsins.