Hermann: Fáum borgað og allir eru því sáttir

Mikið óvissuástand hefur verið hjá enska úrvalsdeildarfélaginu Portsmouth í sambandi við yfirtöku Sulaimans al Fahim á félaginu. Nú er svo komið að leikmenn liðsins fengu ekki laun sín borguð í dag en þeir eru vanir að fá laun sín greidd fyrsta hvers mánaðar.

Landsliðsfyrirliðinn Hermann Hreiðarsson leikur sem kunnugt er með Portsmouth en hann er einnig trúnaðarmaður leikmanna og hefur því staðið í hringiðunni.

„Það er búið að greina okkur frá stöðu mála því það kom aðili frá launadeild félagsins og sagði að við myndum fá launin greidd á morgun og allir eru því sáttir," segir Hermann við BBC.

Knattspyrnustjórinn Paul Hart hjá Portsmouth sagði að leikmennirnir þyrfti alls ekki að örvænta þó svo að dregist hefði að borga þeim laun og hann var ánægður með þann skilning sem leikmennirnir sýndu og hrósaði þeim fyrir að standa áfram þétt við bakið á stjórn félagsins.