Aquilani spilaði með varaliði Liverpool í kvöld

Alberto Aquilani klæddist loksins treyju Liverpool í kvöld þegar hann kom inn á sem varamaður í 2-0 sigri varaliðs félagsins gegn Sunderland en Guðlaugur Victor Pálsson var ekki með Liverpool að þessu sinni.

Aquilani kom til Liverpool í ágúst á 20 milljónir punda frá Roma og er ætlað að fylla skarð Xabi Alonso sem var sem kunnugt er seldur til Real Madrid í sumar.

Þrátt fyrir að Aquilani hafi einungis spilað í fimmtán mínútur í leiknum verða það að teljast afar jákvæðar fréttir fyrir Liverpool að þessi 25 ára landsliðsmaður Ítalíu sé óðum að ná sér á strik eftir að hafa gengist undir aðgerð á ökkla í sumar.