Kjötiðnaðarmenn harma sleggjudóm

Meistarafélag kjötiðnaðarmanna harmar það sem þeir kalla sleggjudóm frá bændum á Hálsi í Kjós, sem á dögunum fullyrtu að nautahakk væri stundum blandað með ýmsu öðru án þess að þess sé getið á umbúðum. „Þar er fullyrt án rökstuðnings að vörusvik fari fram á okkar neytendamarkaði," segja kjötiðnaðarmenn í ályktuninni.

„Á Íslandi er í fullgildi matvælalöggjöf og reglugerðir um matvælaframleiðslu sem eru í hávegum hafðar í öllum viðurkendum kjötvinnslum, en þar starfa kjötiðnaðarmeistarar og kjötiðnaðarmenn. Þar er í öllu farið eftir þeim reglum sem á markaðinum gilda hverju sinni," segir einnig.

Þá benda þeir á Matvælaeftirlitið, sem fylgist með að reglum sé fylgt og Neytendasamtökin sem taka á vörusvikum sé til þeirra leitað. „MFK vonar að hjá bændum á Hálsi í Kjós hafi orðið einhver misskilningur, sem vonandi verður leiðréttur sem fyrst, að öðrum kosti viljum við sjá rökstuðning við þessum fullyrðingum svo hægt sé að taka á málinu."

Að endingu segir að svikin vara megi ekki vera í umferð, það sé kjötiðnaðinum til lítilslækkunar. „Á slíkum málum verður að taka reynist það rétt. Til þess höfum við matvælaeftirlit."