Engar vísbendingar fundist um falsað nautahakk

Heilbrigðiseftirlit Reykjavíkur- Matvælaeftirlit segist ekki hafa fundið neinar vísbendingar sem renna stoðum undir fullyrðingu nautabóndans Þórarins Jónssonar á Hálsi um að nautahakk sé drýgt með öðru kjöti en nautakjöti og svo selt ómerkt í verslunum.

Þórarinn sagði upprunalega í viðtali við sjóvarp Morgunblaðsins að hann vissi til þess að nautahakk væri stundum drýgt með hrossakjöti, svínafitu eða kartöflumjöli. Hakkið væri svo selt í verslunum en ekki væri sérstaklega tilgreint um þessi aukaafurðir á pakkningum.

Heilbrigðiseftirlit Reykjavíkur- Matvælaeftirlit sendi frá sér tilkynningu þar sem kom fram að merki um slíkt hafi hvorki fundist í kjötvinnslum í Reykjavík né verslunum.

Þá segir ennfremur í tilkynningunni:

„Matvælastofnun og Heilbrigðiseftirlit sveitarfélaga annast eftirlit með framleiðendum. Matvælaeftirlit í landinu tekur allar yfirlýsingar um brot á íslenskri matvælalöggjöf alvarlega og rannsakar slíkar ábendingar. Matvælaeftirlit Reykjavíkur hefur í dag reynt að fá upplýsingar um meint brot á reglum um kjötvörur. Engar vísbendingar hafa fengist um þessi brot."

Óskar Í. Sigurðsson er deildarstjóri Matvælaeftirlits Reykjavíkur.